好多時都會聽到朋友話出面落雨，係時候要揸架車出去當洗車。

雨水雖然睇落好乾淨，但帶酸性，如果由得佢喺車身上面風乾，長遠而言會侵蝕車漆。而無論係清水定係雨水，風乾途中都會有塵粘住。如果路邊嘅漬水彈上架車更加污糟。

所以落完雨，最低限度都要用毛巾抺乾車身，甚至用清水沖洗一次全車。尤其如果係白色或淺色車，就更加要盡快抹乾，否則車門手柄位好易出現淚痕。長時間唔理佢，更會令痕跡無法完全清洗，相當影響外觀。